អន្តរជាតិ: ក្រុមហ៊ុនផលិតស្រាវីស្គីរបស់ស្កុតឡែន Gordon & MacPhail បានដាក់បង្ហាញនូវស្រាវីស្គីដែលមានអាយុកាលចំណាស់ជាងគេបំផុតនៅលើពិភពលោក វាគឺជាស្រាស្កុតវីស្គីដែលមានអាយុ ៨០ឆ្នាំហើយនឹងត្រូវដាក់ដេញថ្លៃនៅក្រុមហ៊ុនសូធេប៊ី (Sotheby) ក្នុងខែវិច្ឆិកានេះ។

ដបវីស្គីគ្រីស្តាល់ចំណុះ ៧០០ មីល្លីលីត្រ “ជំនាន់ ៨០ឆ្នាំ” ត្រូវបានដាក់តាំងបង្ហាញនៅទីក្រុងឡុងដ៍ដោយស្ថាបត្យករ Sir David Adjaye ។ ដបនេះគឺជាដបមួយក្នុងចំណោមដបស្រា ២៥០ ដបទៀតដែលត្រូវបានផលិតចេញពីធុងតែមួយនៅឯរោងចក្រផលិតស្រា Glenlivet របស់ប្រទេសស្កុតឡែន។ ដបស្រាវីស្គីមួយនេះវានឹងក្លាយជាការដាក់ដេញថ្លៃតែមួយគត់ ចំណែក ២៤៩ ដបទៀតអាចរកទិញបានដោយផ្ទាល់។

តម្លៃស្រាទាំងនេះមិនទាន់ត្រូវបានដាក់បង្ហាញនៅឡើយទេ ប៉ុន្តែលោក Adjaye និយាយថាវានឹងមានតម្លៃសាកសមនឹងគុណភាព៖ "ខ្ញុំយកឱកាសនេះដើម្បីស្ងើចសរសើរពីចំណុចពិសេសរបស់ Gordon និង MacPhail ដែលសម្រេចនូវការផលិតស្រាវីស្គីដែលអាចផឹកបានបន្ទាប់ពីមានអាយុកាល ៨០ឆ្នាំហើយ តាមពិតសម្រាប់ខ្ញុំអាចនិយាយបានថាវាគឺជាផ្នែកមួយនៃស្ថាបត្យកម្មដែលប្លែក” តម្លៃដែលទំនងនឹងត្រូវដាក់ដេញថ្លៃប្រមាណចន្លោះពី ១១០,០០០ដុល្លារ ទៅ ២២០,០០០ដុល្លារ។ ហើយវាមានតម្លៃ ៧,៨៥០ដុល្លារក្នុងមួយកូនកែវ (25ml) ៕